苹果 訊:【真係冇鬼用】女人街拍動作戲受傷 心悠BB自嘲：我係一塊豆腐..

劉心悠Annie 最近成日喺女人街出現，原來係拍攝緊關永忠執導， Ron吳卓羲 、 廖啟智、 XeniaChong莊端兒 等主演嘅電影《再見·女人街》，戲中飾演跟車送貨工人嘅心悠BB，早幾日先至喺女人街拍外景，身材瘦削嘅佢企喺貨車尾版上面拉緊架搬貨車出嚟，有fans見到仲以為心悠拍緊月餅廣告自己搬貨做宣傳添！

心悠咁嬌滴滴，做「咕哩」又好似有啲夾夾不入咁，原來唔只要搬搬抬抬，仲有動作戲㗎！今日心悠喺facebook貼相，留言：「今朝在女人街拍攝動作戲分，一開拍就拉親，真係無鬼用！#經驗豐富導演關永忠話無眼睇 #sorry我係一塊豆腐 #再見女人街」，相中見佢用條毛巾按住個右大腿肌肉，估計係用毛巾包住啲冰敷緊拉傷嘅患處。平日keep住有做運動，又成日參加跑馬拉嘅心悠，體能係唔錯，估唔到一開工就受傷，認真水皮。

另外，心悠又喺fb貼咗張夜景相，前一晚喺嘉頓山拍夜班戲，留言：「如果背景剛好有閃電，就完美了#電話camera都影到夜景 #嘉頓山夜景 #再見女人街」。