日日妈妈声｜奶仔带妈咪现身《妈妈声》 分享一家紧密温馨相处

出身普通家庭嘅方绍聪（“奶仔”），同爸爸、妈妈以及患有轻度弱智嘅家姐感情要好。虽然家姐未能以言语同奶仔沟通，但奶仔就话两姐弟默契十足：“其实我同家姐由细到大相处咗好耐，所以可能一个眼神已经知对方想点，或者少少嘢我已经知佢系开心定唔开心。”

奶仔又话难忘家姐睇到自己喺《特技人》中演出后嘅开心反应：“嗰时成家人一齐食饭，咁啱电视播到我嘅画面，家姐睇住个电视，企起身好开心系咁拍手掌，仲行出去指住部电视，再行埋嚟揽住我。我嗰刻好感动，我以为我开心，原来佢戥我更加开心。”

奶仔又话庆幸自己努力工作12年后逐渐为人认识，所以希望透过自己嘅小小知名度，令更多人关注弱势社群；尤其系弱智人士。

而奶仔妈咪“美丽姐”虽然要同时照顾奶仔及轻度弱智长女，不过依然乐天开朗，仲大爆奶仔出世时嘅小秘密：“佢出世已经八磅二，我生佢好辛苦架，我生佢时因为太用力，块脸爆晒微丝血管。”

“美丽姐”又话奶仔细个时同自己有专属嘅母子亲密时间佢话：“我餐餐都要同佢碌咭，我哋用面嚟碌咭咯！”奶仔就回应话：“所以我哋个样咁似系有原因，我哋依家少咗咁做，碌咭同锡锡转咗嚟追女仔，系Work嘅。”最后仲话希望自己好似妈咪咁一直做个开心快活人。

日日妈妈声