【on.cc東網】《繽FUN星網 》：鄭俊弘教1歲囝囝嗌爹哋　同何雁詩追B有共識
藝人鄭俊弘（Fred）與潘靜文（Sherman）今日（20日）現身中環海濱出席活動，為山區兒童收集二手書包出一分力，Fred以活動大使身份為現場觀眾獻唱多首歌曲，Sherman則為大家送上舞蹈表演。

一早到場綵排的Fred，表示太太何雁詩及1歲大囝囝亦會到場支持，又指囝囝正牙牙學語，問到是否想囝囝先學叫爹哋？他說：「聽人講佢哋最初發音通常係Da、Ba咁。」他笑言在家中會偷偷教囝囝叫爹哋，但為免太太唔開心，故希望囝囝先學識叫媽咪，問到會否想添多個？他説：「太太依家開始忙造新歌，我哋都有共識，會等阿仔大啲，2、3歲時再生。」他表示近日正趕拍無綫劇《逆天奇案》，預計9月完成拍攝，屆時會開始錄歌。