理解鄭嘉穎因顧家缺席婚禮 靚湯預告將花球給高海寧

香港文匯報訊（記者 梁靜儀）準新娘湯洛雯（靚湯）昨日到沙田出席活動，清減了不少的靚湯，穿上貼身高衩裙，身材更勝當年選美，當聽到被稱呼做「馬師奶」後，即露出甜笑及做心心手勢， 連旁人都感染到她的開心幸福。

活動上獲贈情侶手機的靚湯，表示如無意外，今次活動會是和馬國明結婚前最後一次出席公開活動。婚禮舉行在即，靚湯表示已過了最緊張的階段，現時是期待多過有壓力。當被問到婚禮地點、日期及何時出發，靚湯繼續保持神秘，只透露婚期會在聖誕節之前，她解釋：「因為可能有啲人素顏搭飛機，唔想有人影到相。」說到馬明被問到婚禮的事都封口，靚湯指沒有唔准對方透露婚禮的事，只是他唔知，而他講了會跳舞，都已講了很多。

她表示婚禮會有60位賓客，除有雙方親友外，有一半是圈中人，包括「2LINE黨」成員朱千雪，張嘉兒、岑杏賢及蔣家旻，還有「鐵馬家族」的兄弟姊妹。談到鄭嘉穎表示沒時間出席婚禮，她大方說：「有請嘉穎，我都明白喺外地辦婚禮提升咗難度，咁有家庭就更難，有啲小朋友好黐身，食一餐飯啫，只係儀式嚟，睇吓返嚟再約食飯，（收到嘉穎嘅禮未？）未收到。」她又稱妹妹湯樂瑤會做伴娘，岑杏賢及高海寧（高Ling）還有圈外朋友等組成姊妹團，她更預告會將花球給高Ling：「佢好多人追，（你又知？）我估咋，我有啲大學同學都叫我介紹高Ling畀佢哋識，我啲朋友唔差㗎，（有冇馬國明咁好）難啲囉，我同佢拍拖後，去服裝間都畀人話我搶咗佢姑爺。」

靚湯為了婚禮積極修身，問到是否準備着性感婚紗行禮？她卻說：「行禮嗰套婚紗唔性感，會簡單啲，因為有長輩，反而影婚紗相嗰套就性感啲，亦準備條有旗袍領嘅晚裝，但金飾就唔帶太多過去，只會帶外婆過身前送畀我、有紀念價值嘅龍鳳鈪，仲有代表我哋嗰對定情公仔，亦會跟傳統，結婚前一晚會有上頭儀式，但一切從簡。」笑問到是否做了人妻後會收起性感？靚湯稱不會突然性感，如工作上要性感，都會尊重另一半，先詢問對方。